ઘરે આવ્યા આપણા અભિનંદન, સ્વાગતમાં લોકો થયા ગાંડા

Published: Friday, March 1, 2019, 18:58 [IST]

અમૃતસરઃ પાકિસ્તાન આર્મીએ બંદી બનાવેલ ભારતીય વિંગ કમાન્ડર અભિનંદન થોડી વારમાં જ ભારત પરત ફરશે. પાકિસ્તાન સેના તેમને અટારી બોર્ડર લઈ આવી છે. અમેરિકા સહિત કેટલાય દેશોના દબાણ અને ભારતના આક્રમક વલણ બાદ પાકિસ્તાન અભિનંદનને પરત મોકલી રહ્યા છે. વિંગ કમાન્ડર અભિનંદનનું હાલ મેડિકલ ચેકઅપ થઈ રહ્યું છે. જે બાદ તેમનો મેડિકલ રિપોર્ટ તૈયાર કરવામાં આવશે. એક વખત રિપોર્ટ તૈયાર થયા બાદ જ તેમને ભારતીય અધિકારીઓને સોંપી દેવામાં આવશે.

એરફોર્સના એમ્બુલન્સ અને ફીલ્ડ હોસ્પિટલના એમ્બ્યુલન્સ અટારી બોર્ડર પર હાલ હાજર છે. જેવા કમાન્ડર અભિનંદન અહીં પહોંચશે કે એરફોર્સના અધિકારીઓ તેમને સાથે લઈ લેશે. જે બાદ તેમને અમૃતસર લઈ જવામાં આવશે. અટારી બોર્ડર પર આ સમયે હજબનો જોશ જોવા મળી રહ્યો છે. જો કે આજે બીટિંગ રિટ્રીટ પરેડ કેન્સલ છે, પરંતુ છતાં અટારી બોર્ડરથી થોડે દૂર માનવ મહેરામણ એકઠું થયું છે. અટરી બોર્ડર પર બીએસએફ અને એરફોર્સના અધીકારીઓ મોટી સંખ્યામાં હાજર છે.

હાલ અટારી બોર્ડર પર કડક સુરક્ષા વ્યવસ્થા ગોઠવી દેવામાં આવી છે. અભિનંદનનું સ્વાગત કરવા માટે મોટી સંખ્યામાં લોકો એકઠા થયા છે અને અટારી ખાતે હાલ મેળા જેવો માહોલ સર્જાયો છે. જણાવી દઈએ કે પાકિસ્તાની એરક્રાફ્ટનો પીછો કરતી વખતે ભારતીય વિંગ કમાન્ડર અભિનંદન વર્ધમાન પાકિસ્તાનની બોર્ડરમાં ઘૂસી ગયા હતા અને પાકિસ્તાનની ધરતી પર જ તેમનું એરક્રાફ્ટ મિગ બિસ્કોન ક્રેશ થઈ જતાં ના છૂટકે તેમણે પાકિસ્તાનની ધરતી પર પેરાશૂટથી ઈજેક્ટ થવું પડ્યું હતું જે બાદ પાકિસ્તાની આર્મીએ તેમની ધરપકડ કરી લીધી હતી.

આ પણ વાંચો- અભિનંદનની મુક્તિ પહેલા પાકિસ્તાને ઠુકરાવી ભારતની આ મોટી માંગ

Published On March 1, 2019