Vibrant gujarat : વાઇબ્રન્ટ ગુજરાત પ્રી-નવરાત્રી ફેસ્ટિવલ ૨૦૨૫ અંતર્ગત ઉદયપુર અને દિલ્હીમાં ગરબા ઉત્સવ યોજાશે

By Desk

Published: Tuesday, September 9, 2025, 11:07 [IST]

Vibrant gujarat : યુનેસ્કો દ્વારા માનવતાના અમૂર્ત સાંસ્કૃતિક વારસા તરીકે માન્યતા પામેલા ગુજરાતના ગરબાની ધૂન હવે રાજસ્થાનના ઉદયપુરમાં પણ ગુંજશે. ગુજરાત સરકારના પ્રવાસન વિભાગે આ પહેલ દ્વારા ગુજરાતની સંસ્કૃતિનો પ્રસાર કરવાનો નવતર અભિગમ અપનાવ્યો છે.

આગામી ૧૪ સપ્ટેમ્બરના રોજ સાંજે ૭:૩૦ કલાકે, ઉદયપુરના ફિલ્ડ ક્લબ ખાતે પ્રથમવાર વાઇબ્રન્ટ ગુજરાત પ્રી-નવરાત્રી ફેસ્ટિવલ ૨૦૨૫નું ભવ્ય આયોજન કરવામાં આવ્યું છે.

આ ખાસ પ્રસંગે રાજસ્થાનના નાયબ મુખ્યમંત્રી સુશ્રી દિયા કુમારી, કેન્દ્રીય કેબિનેટ મંત્રી ગજેન્દ્રસિંહ શેખાવત અને ગુજરાતના પ્રવાસન મંત્રી મૂળુભાઈ બેરા ઉપસ્થિત રહેશે.

ઉત્સવમાં પ્રખ્યાત ગાયક શ્રી પાર્થિવ ગોહિલ લાઈવ પરફોર્મન્સ આપશે. આ ઉપરાંત ગુજરાતી લોકનૃત્ય, તલવાર રાસ, ગોફ ગૂંથણ અને મણિયારો રાસ જેવા પરંપરાગત નૃત્યો પણ રજૂ કરવામાં આવશે, જે ખેલૈયાઓમાં અનેરો ઉત્સાહ ભરશે.

પ્રથમવાર નવરાત્રી પછી શરદ પૂનમની રાત્રે દિલ્હીમાં પણ એક ખાસ ગરબા મહોત્સવનું આયોજન કરવામાં આવ્યું છે, જેથી દિલ્હીવાસીઓ પણ ગરબાની મજા માણી શકે.

ઉત્સવ પહેલાં ઉદયપુરના સ્થાનિકો અને મુલાકાતીઓ માટે ૮ થી ૧૩ સપ્ટેમ્બર દરમિયાન JCA ડાન્સ એન્ડ સ્પોર્ટ્સ ફિટનેસ હબ ખાતે નિઃશુલ્ક ગરબા વર્કશોપ યોજાશે. આ વર્કશોપનો સમય સવારે ૧૦ થી ૧ અને સાંજે ૭ થી ૧૧ કલાકનો રહેશે આ કાર્યક્રમમાં પ્રવેશ બધા માટે નિઃશુલ્ક છે અને પરંપરાગત પોશાક ફરજિયાત રહેશે.

ખેલૈયાઓને પ્રોત્સાહન આપવા માટે, શ્રેષ્ઠ પરંપરાગત પોશાક, શ્રેષ્ઠ ગરબા પ્રદર્શન અને શ્રેષ્ઠ ખેલૈયાઓ માટે ૫,૦૦૦ સુધીના આકર્ષક વાઉચર અને ઈનામો આપવામાં આવશે.

Published On September 9, 2025