Swaminarayan sadhu controversy : સ્વામિનારાયણના વધુ એક સ્વામીનો બફાટ, ચારણબાઈનું અપમાન કરતો વીડિયો વાયરલ

By Desk

Published: Thursday, March 6, 2025, 13:56 [IST]

Swaminarayan sadhu controversy : સ્વામિનારાયણ સંપ્રદાયના સ્વામીઓ દ્વારા વિવાદિત નિવેદનો આપવાના કિસ્સાઓ સતત વધતા જાય છે. માતેલા સાંઢની જેમ આ સાધુઓ હવે મંચ પરથી બીજા દેવી દેવતાઓના સતત અપમાન કરી રહ્યાં છે.

હવે આવો જ એક વધુ વિવાદ મોરબીના હળવદમાં સામે આવ્યો છે. અહીં રણમલપુર ગામે ચાલી રહેલી કથામાં રણજીતગઢ હરિકૃષ્ણ ધામના સ્વામી ભક્તિ સ્વામીએ ચારણબાઈને લઈને વિવાદિત ટિપ્પણી કરતા લોકોમાં રોષ ફેલાયો છે.

આ ઘટનાનો વિડિયો સોશિયલ મીડિયા પર વાયરલ થયો છે. વીડિયોમાં સ્વામી ચારણદબાઈ માટે અપમાનજનક વાત કરતા જોવા મળી રહ્યાં છે.

વાયરલ વીડિયોમા્ં સ્વામી એક વ્યક્તિના રોગ વિશે વાત કરી રહ્યા છે. તેમણે જણાવ્યું કે એક વ્યક્તિને રોગ થતાં તેના સસરાએ ચારણબાઈ પાસેથી મંત્ર લખેલો પાળો આપ્યો હતો. આ પાળાને દોરામાં બાંધીને સસરાએ જમાઈને પહેરાવ્યો.

આ દરમિયાન સ્વામિનારાયણ ભગવાન દર્શન આપવા આવ્યા પરંતુ ગળામાં પાળો જોયા બાદ પાછા જતા રહ્યા. સ્વામિનારાયણ ભગવાને કહ્યું હતું કે પાળાના કારણે તેઓ પાછા ફરી ગયા અને વ્યક્તિને સલાહ આપી કે તે પાળો દૂર કરી મંદિરમાં આવે, જેથી તેની સમસ્યા દૂર થઈ શકે.

સ્વામીના આ નિવેદનને લઈને લોકોમાં ભારે રોષ છે. ચારણબાઈ વિશે કરાયેલી આ ટિપ્પણી આગળ જતા મોટો વિવાદ સર્જી શકે છે. શાસ્ત્રવિદોએ પણ આ પ્રકારની ટિપ્પણીઓને અયોગ્ય ગણાવી છે. સોશિયલ મીડિયામાં આ વિડીયોને લઈને લોકો સ્વામી વિરુદ્ધ આક્રોશ વ્યકત કરી રહ્યા છે.

જણાવી દઈએ કે આ પહેલી વખત નથી જ્યારે સ્વામિનારાયણ સંપ્રદાયના કોઈ સાધુઓએ બીજા દેવી દેવતાઓનું અપમાન કર્યુ હોય. આ પહેલા પણ આવા ઘણા કિસ્સા સામે આવી ચુક્યા છે.

હાલમાં જ જ્ઞાનપ્રસાદ નામના એક સ્વામીએ બફાટ કરતા જલારામ બાપા પર હલકી કક્ષાની ટિપ્પણી કરી હતી, જેને લઈને પણ લોકોમાં રોષ જોવા મળ્યો હતો.

સ્વામિનારાયણના સાધુઓના આવા બફાટને કારણે લોકોમાં દિવસે દિવસે રોષ વધી રહ્યો છે. આવા વિવાદિત નિવેદનો ધાર્મિક સમાજમાં વિખવાદ પેદા કરી શકે છે.

આ અંગે સ્વામિનારાયણ સંપ્રદાય દ્વારા શું સ્પષ્ટતા આપવામાં આવશે અને આ મામલે શું પગલાં લેવામાં આવશે તે જોવાનું રહેશે.

Published On March 6, 2025