સાણંદના કલાણા જૂથ અથડામણ કેસમાં 3 મહિલા સહિત 25 શખ્સોની ધરપકડ

અમદાવાદ જિલ્લાના સાણંદ તાલુકાના કલાણા ગામમાં તાજેતરમાં થયેલી જૂથ અથડામણ મામલે પોલીસે કડક કાર્યવાહી હાથ ધરી છે.

સાણંદ જીઆઈડીસી પોલીસે આ હિંસક ઘટનામાં સંડોવાયેલા 3 મહિલાઓ સહિત કુલ 25 લોકોની ધરપકડ કરી કાયદેસરની કાર્યવાહી કરી છે.

પોલીસ તપાસમાં સામે આવ્યું છે કે ઝડપાયેલા 25 આરોપીઓ પૈકી 5 શખ્સો અગાઉ પણ ગુનાહિત ઇતિહાસ ધરાવે છે. આ સમગ્ર વિવાદ પાછળનું મુખ્ય કારણ એક સગીર અને આરોપીઓ વચ્ચે થયેલી સામાન્ય બોલાચાલી હોવાનું પોલીસ તપાસમાં બહાર આવ્યું છે.

ઘટનાનો એક વીડિયો પણ સોશિયલ મીડિયા પર વાયરલ થયો છે, જેમાં પથ્થરમારાની ઘટના પહેલાંની તકરાર જોવા મળી રહી છે. કલાણા ગામના તળાવ પાસે એકબીજા સામે જોવાની સામાન્ય બાબતે સગીર અને આરોપીઓ વચ્ચે ઉગ્ર બોલાચાલી થઈ હતી.

જોતજોતામાં આ સામાન્ય ઝઘડાએ મોટું સ્વરૂપ ધારણ કર્યું હતું અને બે જૂથો આમને-સામને આવી જઈ પથ્થરમારો કર્યો હતો. પથ્થરમારાની ઘટના બાદ પોલીસે ગામમાં ચુસ્ત બંદોબસ્ત ગોઠવી તપાસ શરૂ કરી હતી અને અંદાજે 60 જેટલા શંકાસ્પદોની અટકાયત કરી હતી.

અટકાયત કરાયેલા 60 લોકોમાંથી 25 લોકોની સંડોવણી જણાતા તેમની ધરપકડ કરી હવે તેમને કોર્ટમાં રજૂ કરવાની તજવીજ હાથ ધરાઈ છે.

English summary

A clash in Kalana village, Sanand taluka, Ahmedabad district, led to a robust police response and 25 arrests, including five with prior criminal histories. The altercation began from a minor dispute and escalated to stone-throwing, with a video circulating on social media. Investigations and court proceedings are ongoing.