Gujarat Weather: ગુજરાતમાં આજે આ જગ્યાએ ગાજવીજ સાથે પડશે વરસાદ, જાણો હવામાન વિભાગની આગાહી

Gujarat Weather: ગુજરાતમાં ગરમી અને વાદળછાયા વાતાવરણ વચ્ચે આજથી 11 જૂન સુધી ઘણા વિસ્તારોમાં સામાન્યથી હળવા વરસાદની આગાહી કરવામાં આવી છે.

હવામાન વિભાગના જણાવ્યા મુજબ અમુક વિસ્તારોમાં ચોમાસાની શરુઆત પહેલા આજથી જ હવામાન પલટાવાની શરુઆત થઈ જશે. મુંબઈમાં 5 જૂનથી વરસાદની શરુઆત થઈ ગઈ છે. આગામી 2-3 દિવસમાં ગુજરાતમાં પણ વરસાદનુ પ્રમાણ વધશે.

આઈએમડીના જણાવ્યા મુજબ રાજ્યમાં આજથી પ્રી-મોન્સુન એક્ટિવિટી શરુ થશે. સૌ પ્રથમ દક્ષિણ ગુજરાત અને ત્યારબાદ સૌરાષ્ટ્ર, મધ્ય અને પૂર્વ ગુજરાતમાં વરસાદની શરુઆત થઈ શકે છે. આજે દાહોદ, છોટાઉદેપુર, તાપી, ડાંગ, નવસારી, વલસાડ, દમણ, દાદરા નગર હવેલીમાં છૂટાછવાયા સ્થળોએ ગાજવીજ સાથે હળવો વરસાદ પડવાની આગાહી કરવામાં આવી છે.

હવામાન વિભાગની આગાહી મુજબ 7 જૂને દાહોદ, છોટા ઉદેપુર, વલસાડ, તાપી, નર્મદા, નવસારીમાં વરસાદ પડી શકે છે. વળી, 8 જૂને ગીર સોમનાથ, અમરેલી, ભાવનગર, આણંદ, પંચમહાલ, દાહોદ, વડોદરા, છોટાઉદેપુર, નર્મદા, તાપી, ડાંગ, નવસારી, વલસાડમાં વરસાદ આવી શકે છે.

આ ઉપરાંત, 9 અને 10 જૂને રાજકોટ, જૂનાગઢ, અમરેલી, ગીર સોમનાથ, ભાવનગર, બોટાદ, સાબરકાંઠા, મહેસાણા, ગાંધીનગર, અરવલ્લી, અમદાવાદ, ખેડા, મહીસાગર, આણંદ, પંચમહાલ, દાહોદ, વડોદરા, છોટાઉદેપુર, ભરૂચ, નર્મદા, સુરત, તાપી, ડાંગ, વલસાડ, નવસારીમાં વરસાદ થઈ શકે છે. આઈએમડીના જણાવ્યા મુજબ 9થી 11 જૂન દરમિયાન ભારે વરસાદની સંભાવના છે.

હવામાન વિભાગના આંકડાઓ મુજબ રાજ્યમાં બુધવારે અમદાવાદમાં 41.7 ડિગ્રી અને સુરેન્દ્રનગરમાં 41.8 ડિગ્રી તાપમાન નોંધાયુ હતુ. બંને શહેર રાજ્યમાં સૌથી વધુ ગરમ રહ્યા હતા. આ ઉપરાંત ગાંધીનગરમાં 41.5 ડિગ્રી, વિદ્યાનગરમાં 40.9 ડિગ્રી, રાજકોટમાં 41.4 ડિગ્રી તાપમાન નોંધાયુ હતુ.

English summary

Gujarat Weather: Rain forecast for these parts of the states, Know IMD details here.