ગુજરાતમાં કાળઝાળ ગરમી પડવાની હવામાન વિભાગની આગાહી, જાણો તમારા શહેરમાં કેવો રહેશે માહોલ

By Desk

Published: Wednesday, March 11, 2026, 8:54 [IST]

Gujarat Weather: ગુજરાતમાં ઉનાળાની શરૂઆતમાં જ સૂર્યદેવ આકરા પાણીએ થયા હોય તેવું લાગી રહ્યું છે. હવામાન વિભાગ (IMD) ની તાજી આગાહી મુજબ, રાજ્યમાં આગામી દિવસોમાં અંગ દઝાડતી ગરમી પડવાની શક્યતા છે. ખાસ કરીને અમદાવાદ અને ગાંધીનગર સહિતના શહેરોમાં તાપમાનનો પારો સતત ઊંચો જઈ રહ્યો છે, જેને પગલે વહીવટી તંત્ર દ્વારા સાવચેતીના ભાગરૂપે એલર્ટ જાહેર કરવામાં આવ્યું છે.

કયા શહેરોમાં કેવું એલર્ટ?

હવામાન વિભાગે રાજ્યના વિવિધ ભાગોમાં ગરમીની તીવ્રતાને જોતા યલો અને ઓરેન્જ એલર્ટ જાહેર કર્યું છે:

ઓરેન્જ એલર્ટ: રાજકોટ, મોરબી, સુરેન્દ્રનગર અને કચ્છમાં કાળઝાળ ગરમીની સંભાવનાને પગલે ઓરેન્જ એલર્ટ અપાયું છે.
યલો એલર્ટ: અમદાવાદ, ગાંધીનગર, સુરત, વડોદરા, જૂનાગઢ, બોટાદ, જામનગર, અમરેલી, ભાવનગર અને ગીર સોમનાથમાં ગરમીનું જોર વધતા યલો એલર્ટ જાહેર કરવામાં આવ્યું છે.

તાપમાનના આંકડા: રાજકોટ રાજ્યમાં સૌથી ગરમ

છેલ્લા 24 કલાકમાં રાજ્યના મુખ્ય શહેરોમાં નોંધાયેલ મહત્તમ તાપમાન નીચે મુજબ છે:

આગામી 90 દિવસ ભારે: IMDની ચેતવણી

હવામાન વિભાગના જણાવ્યા અનુસાર, આગામી 90 દિવસો દરમિયાન દેશના મેદાની અને અંતરિયાળ વિસ્તારોમાં આકરી લૂ (Heatwave) લાગવાની શક્યતા છે. માર્ચ મહિનામાં જ ગુજરાત સહિત દેશના મોટાભાગના વિસ્તારોમાં તાપમાન સામાન્ય કરતા ઊંચું રહેશે. જોકે, ઉત્તર-પશ્ચિમ અને મધ્ય ભારતના કેટલાક ભાગોમાં તાપમાનમાં થોડો ઘટાડો જોવા મળી શકે છે.

વાતાવરણમાં કેમ આવ્યો અચાનક બદલાવ?

હાલમાં મિશ્ર વાતાવરણની અસર જોવા મળી રહી છે. વેસ્ટર્ન ડિસ્ટરબન્સના કારણે ઉત્તર ભારતના પહાડી રાજ્યો જેવા કે જમ્મુ-કાશ્મીર, હિમાચલ પ્રદેશ અને ઉત્તરાખંડમાં હળવો વરસાદ અને હિમવર્ષા થઈ શકે છે. તેની અસરથી ત્યાં ઠંડીમાં થોડો વધારો થશે, પરંતુ મેદાની વિસ્તારો જેવા કે પંજાબ, હરિયાણા, રાજસ્થાન અને દિલ્હીમાં તાપમાન સામાન્ય કરતા 3થી 5 ડિગ્રી વધી શકે છે.

વાચકો માટે સલાહ: ગરમીથી બચવા માટે બપોરના સમયે બિનજરૂરી બહાર નીકળવાનું ટાળવું અને પુષ્કળ પ્રમાણમાં પ્રવાહી લેવું હિતાવહ છે.

Published On March 11, 2026