રાજ્યના આ જિલ્લાઓ પર માવઠાનો ખતરો, હવામાન વિભાગની આગાહી
ગુજરાતમાં શિયાળાની વિદાય વચ્ચે ફરી એકવાર હવામાન પલટાયું છે. હવામાન વિભાગની લેટેસ્ટ આગાહી મુજબ રાજ્યના અનેક વિસ્તારોમાં કમોસમી વરસાદની પ્રબળ શક્યતા છે. ખાસ કરીને ઉત્તર ગુજરાતના જિલ્લાઓમાં વાતાવરણમાં મોટો ફેરફાર જોવા મળી રહ્યો છે.
હાલમાં વેસ્ટર્ન ડિસ્ટર્બન્સ, સાયક્લોનિક સર્ક્યુલેશન અને ટ્રફ એમ ત્રણ સિસ્ટમ્સ સક્રિય છે. આ સિસ્ટમોને કારણે રાજ્યભરમાં વાદળછાયું વાતાવરણ સર્જાયું છે અને ઠંડા પવનો ફૂંકાઈ રહ્યા છે. ઉત્તર-પશ્ચિમ દિશાના પવનોની ગતિ આગામી કલાકોમાં સામાન્ય કરતા વધુ રહેવાની શક્યતા છે.
આજે 18 ફેબ્રુઆરીએ સાબરકાંઠા, અરવલ્લી, મહીસાગર અને દાહોદમાં હળવો વરસાદ પડી શકે છે. આ વિસ્તારોમાં ગાજવીજ સાથે 30 થી 40 કિમીની ઝડપે પવન ફૂંકાવાની આગાહી છે. પૂર્વ અને ઉત્તર ગુજરાતના આ ચાર જિલ્લાઓમાં માવઠાની સૌથી વધુ અસર વર્તાશે.
તાપમાનની વાત કરીએ તો આગામી બે દિવસ સુધી મહત્તમ તાપમાન યથાવત રહેશે. ત્યારબાદ તાપમાનમાં 2 થી 3 ડિગ્રીનો વધારો થતાં બપોરના સમયે ગરમીનો અનુભવ થશે. લઘુત્તમ તાપમાનમાં પણ ક્રમશઃ વધારો થવાની શક્યતા હવામાન વિભાગે વ્યક્ત કરી છે.
જોકે, આગામી 19 થી 24 ફેબ્રુઆરી દરમિયાન રાજ્યમાં હવામાન મુખ્યત્વે સૂકું રહેશે. વરસાદની આગાહીને પગલે ખેડૂતોને તેમનો તૈયાર પાક સુરક્ષિત સ્થળે ખસેડવા સૂચના અપાઈ છે. માર્કેટિંગ યાર્ડમાં રહેલા અનાજને પલળતું બચાવવા માટે વહીવટી તંત્રે પણ સાવચેતી દાખવી છે.
કમોસમી વરસાદને કારણે ઘઉં, જીરું અને રાયડા જેવા રવિ પાકને નુકસાન થવાની ભીતિ છે. વહેલી સવારથી જ આકાશ કાળાડિબાંગ વાદળોથી ઘેરાતા ખેડૂતોની ચિંતામાં મોટો વધારો થયો છે. તૈયાર ઊભો પાક પલળી જવાથી તેની ગુણવત્તા બગડવાનો ભય પણ સતાવી રહ્યો છે.
Click it and Unblock the Notifications
Sign in with Google
