હવામાન સમાચાર: ભારે વરસાદથી રાજ્યમાં તારાજી સર્જાઈ, પુરમાં 9 લોકોના મોત, 15 હજારનું કરાયું સ્થળાંતર

Gujarat Rain Update: ગુજરાતમાં સતત ત્રીજા દિવસે ભારે વરસાદને કારણે સામાન્ય જનજીવન ખોરવાઈ ગયું હતું અને નીચાણવાળા વિસ્તારોમાં પૂરની સ્થિતિ સર્જાઈ હતી.

રાજ્યમાં ભારે વરસાદ અને પૂરના કારણે નવ લોકોના મોત થયા છે, જ્યારે 300 લોકોને બચાવી લેવામાં આવ્યા છે.

સતત વરસાદને કારણે ડેમ અને નદીઓના પાણીના સ્તરમાં વધારો થતાં 15 હજારથી વધુ લોકોને સુરક્ષિત સ્થળોએ ખસેડવામાં આવ્યા છે.

વહીવટીતંત્રે મોટા પાયે બચાવ અને રાહત કામગીરી હાથ ધરી છે. આ ઓપરેશનમાં સેનાની છ ટુકડીઓ તૈનાત કરવામાં આવી છે.

બચાવ કામગીરી માટે દેવભૂમિ દ્વારકા, આણંદ, વડોદરા, ખેડા, મોરબી અને રાજકોટ જિલ્લામાં સેનાની એક-એક ટુકડી તૈનાત કરવામાં આવી છે, જ્યારે પૂરગ્રસ્ત વિસ્તારોમાં NDRFની 14 પ્લાટુન અને SDRFની 22 પ્લાટુન તૈનાત કરવામાં આવી છે.

અધિકારીઓના જણાવ્યા અનુસાર, રાજ્યના વિવિધ ભાગોમાં વરસાદ સંબંધિત ઘટનાઓમાં, ગાંધીનગર, ખેડા અને વડોદરા જિલ્લામાં દિવાલ ધરાશાયી થવાની ઘટનામાં ચાર લોકોના મોત થયા હતા.

જ્યારે આણંદ જિલ્લામાં વૃક્ષો પડવાથી એક વ્યક્તિનું મોત થયું હતું, અને એક વ્યક્તિ વરસાદના પાણીમાં ડૂબી ગઈ હતી. અન્ય બે લોકોએ જીવ ગુમાવ્યા છે.

પંચમહાલ, નવસારી, વલસાડ, વડોદરા, ભરૂચ, ખેડા, ગાંધીનગર, બોટાદ અને અરવલ્લી જિલ્લાઓમાં વહીવટી તંત્રએ નદીઓ અને ડેમોમાં પાણીના સ્તરમાં વધારો અને નીચાણવાળા વિસ્તારોમાં પૂરની સ્થિતિ વચ્ચે સાવચેતીના પગલારૂપે હજારો લોકોને સલામત સ્થળે ખસેડ્યા છે.

પંચમહાલમાં, જિલ્લા વહીવટીતંત્રે લગભગ બે હજાર લોકોને સલામત સ્થળે ખસેડ્યા છે, જ્યારે નવસારીમાં આ આંકડો 1,200, વડોદરામાં 1,000 અને વલસાડમાં 800 છે.

સ્ટેટ ઇમરજન્સી ઓપરેશન સેન્ટર (SEOC) દ્વારા શેર કરવામાં આવેલા આંકડા અનુસાર, ગુજરાતમાં અત્યાર સુધીમાં સરેરાશ વાર્ષિક વરસાદના લગભગ 100 ટકા વરસાદ થયો છે. IMD એ બુધવાર અને ગુરુવારે સૌરાષ્ટ્ર-કચ્છ પ્રદેશમાં ભારે વરસાદની આગાહી કરી છે.

આવા સમયે, હવામાન વિભાગ દ્વારા ગુરુવાર સુધી સમગ્ર રાજ્યમાં ભારેથી અતિભારે વરસાદની આગાહી કરવામાં આવી છે.

English summary

Gujarat Rain Update: Heavy rains created desolation in the state, 9 people died in the flood, 15 thousand were evacuated