Gujarat News: કમોસમી વરસાદથી અસરગ્રસ્ત 17.92 લાખ ખેડૂતોને 5330 કરોડથી વધુ સહાય ચૂકવાઈ, જાણો વધુ વિગત

Gujarat News: ગુજરાતના મુખ્યમંત્રી ભૂપેન્દ્ર પટેલની અધ્યક્ષતામાં આજે ગાંધીનગર ખાતે રાજ્ય કેબિનેટની મહત્વની બેઠક યોજાઈ હતી. આ બેઠકમાં ખેડૂતોને આપવામાં આવતા કૃષિ રાહત પેકેજ અને ટેકાના ભાવે ચાલી રહેલી ખરીદી અંગે વિસ્તૃત સમીક્ષા કરવામાં આવી હતી. સરકારના પ્રવક્તા મંત્રીએ બેઠક બાદ પત્રકારોને આ અંગેની મહત્વની વિગતો પૂરી પાડી હતી.

કૃષિ રાહત પેકેજ: ખેડૂતોના ખાતામાં જમા થઈ કરોડોની સહાય

રાજ્યમાં થયેલા ભારે વરસાદ અને કમોસમી માવઠાને કારણે ખેતીને થયેલા નુકસાન માટે સરકારે ઐતિહાસિક રાહત પેકેજ જાહેર કર્યા હતા. જેની પ્રગતિ અંગે નીચે મુજબની વિગતો સામે આવી છે.

• સીધી સહાય: અત્યાર સુધીમાં રાજ્યના 17.92 લાખ ખેડૂતોને 5330.43 કરોડથી વધુની રકમ સીધી તેમના બેંક ખાતામાં (DBT દ્વારા) ચૂકવી દેવામાં આવી છે.
• અરજીઓની સ્થિતિ: કુલ 30.71 લાખથી વધુ ખેડૂતોએ સહાય માટે ઓનલાઈન ફોર્મ ભર્યા હતા, જેમાંથી અત્યાર સુધીમાં 26.60 લાખ અરજીઓ મંજૂર કરી દેવામાં આવી છે.
• તૈયાર બિલો: કુલ 23.18 લાખ ખેડૂતો માટે 6890.98 કરોડના ઓનલાઇન બિલો તૈયાર થઈ ચૂક્યા છે, જેની બાકી રકમ પણ ટૂંક સમયમાં ચૂકવાશે.

ટેકાના ભાવે ખરીદીમાં નવો રેકોર્ડ

કેબિનેટ બેઠકમાં મગફળી, મગ, અડદ અને સોયાબીનની ટેકાના ભાવે ખરીદી અંગે પણ ચર્ચા થઈ હતી. આ વર્ષે નોંધણીમાં ગત વર્ષ કરતા અઢી ગણો વધારો જોવા મળ્યો છે.

• ખરીદ કેન્દ્રો: રાજ્યના 114 તાલુકાઓમાં 317 જેટલા ખરીદ કેન્દ્રો કાર્યરત કરવામાં આવ્યા છે.
• કુલ ખરીદી: અત્યાર સુધીમાં 4.75 લાખ ખેડૂતો પાસેથી અંદાજે 7,537 કરોડની કિંમતની 10.49 લાખ મેટ્રિક ટન જણસોની ખરીદી કરવામાં આવી છે.
• ચુકવણું: ટેકાના ભાવે વેચાણ કરનારા 2.18 લાખ ખેડૂતોને 3,468 કરોડની રકમ સીધી તેમના ખાતામાં જમા કરી દેવામાં આવી છે.

સરકારનો ખેડૂતલક્ષી અભિગમ

CM ભૂપેન્દ્ર પટેલે જણાવ્યું હતું કે, કમોસમી વરસાદની આફતમાં ખેડૂતોને પાયમાલ થતા બચાવવા સરકારે રેકોર્ડબ્રેક સમયમાં કાર્યવાહી કરી છે. રાજ્ય સરકાર ખેડૂતોને આર્થિક ટેકો પૂરો પાડવા અને પારદર્શી રીતે સહાય પહોંચાડવા માટે કટિબદ્ધ છે.

English summary

Gujarat Cabinet Meeting Update: Under CM Bhupendra Patel, ₹5330 crore in aid has been deposited directly into the accounts of 17.92 lakh farmers. Over 10 lakh MT of crops have been purchased at MSP.