ગુજરાત બોર્ડ 12 સાયન્સના રિપીટર્સ વિદ્યાર્થીઓનુ આવ્યુ પરિણામ, 15% વિદ્યાર્થીઓ જ થયા પાસ

આજે ધોરણ 12 વિજ્ઞાનપ્રવાહના રિપીટર વિદ્યાર્થીઓનુ પરિણામ જાહેર કરવામાં આવ્યુ છે.

અમદાવાદઃ કોરોના મહામારીની બીજી લહેરના કારણે આ વર્ષે ધોરણ 10 અને 12માં બોર્ડની રેગ્યુલર વિદ્યાર્થીઓની પરીક્ષાઓ રદ કરીને તેમને પ્રમોશન આપવામાં આવ્યુ હતુ જ્યારે રિપીટર વિદ્યાર્થીઓની પરીક્ષા 15 જુલાઈએ લેવામાં આવી હતી. આજે ધોરણ 12 વિજ્ઞાનપ્રવાહના રિપીટર વિદ્યાર્થીઓનુ પરિણામ જાહેર કરવામાં આવ્યુ છે. 12 સાયન્સના કુલ 32465 વિદ્યાર્થીઓમાંથી 30343 વિદ્યાર્થીઓએ જ પરીક્ષા આપી હતી. જેમાંથી કુલ 4649 વિદ્યાર્થીઓ જ પાસ થયા છે જેમાં 2281 વિદ્યાર્થી અને 2363 વિદ્યાર્થીનીઓ છે.

ગુજરાત માધ્યમિક અને ઉચ્ચતર માધ્યમિક શિક્ષણ બોર્ડની યાદી મુજબ જુલાઈમાં યોજાયેલી ધોરણ 12 સાયન્સના રિપીટર વિદ્યાર્થીઓ પોતાના બેઠક નંબરના આધારે પરિણામ જોઈ શકશે. આ પરીક્ષાનુ પરિણામ બોર્ડની વેબસાઈટ પર સવારે 8 વાગે જાહેર કરવામાં આવ્યુ છે. વિદ્યાર્થીઓ બોર્ડની વેબસાઈટ પર result.gseb.org પર જઈને પોતાનો સીટ નંબર નાખીને પરિણામ જોઈ શકશે. માર્કશીટ માટેની જાહેરાત પછીથી કરવામાં આવશે.

તમને જણાવી દઈએ કે રિપીટર વિદ્યાર્થીઓમાં એ ગ્રુપમાં 7777 વિદ્યાર્થીઓએ પરીક્ષા આપી હતી જેમાં 1130 વિદ્યાર્થીઓ પાસ થયા છે. જ્યારે એ ગ્રુપમાં 1425 વિદ્યાર્થીઓએ પરીક્ષા આપી હતી જેમાંથી 297 વિદ્યાર્થીનીઓ પાસ થઈ છે. વળી, બી ગ્રુપમાં 9554 વિદ્યાર્થીઓએ પરીક્ષા આપી હતી જેમાંથી 1151 વિદ્યાર્થીઓ પાસ થયા છે. જ્યારે બી ગ્રુપમાં 11578 વિદ્યાર્થીનીઓએ પરીક્ષા આપી હતી જેમાંથી 2071 વિદ્યાર્થીનીઓ પાસ થઈ છે. એબી ગ્રુપના 6 વિદ્યાર્થી અને 3 વિદ્યાર્થીની હતા જેમાંથી કોઈ પાસ થયુ નથી. એ ગ્રુપનુ પરિણામ વધુ સારુ આવ્યુ છે.

ઉલ્લેખનીય છે કે 12 સાયન્સના રેગ્યુલર વિદ્યાર્થીઓને માસ પ્રમોશનની જાહેરાત કર્યા બાદ ધોરણ 10 અને 12ના 4.91 લાખ રિપીટર્સ વિદ્યાર્થીઓએ પણ માસ પ્રમોશનની માંગ કરી હતી. રિપીટર વિદ્યાર્થીઓએ કલેક્ટર કચેરી અને શિક્ષણ અધિકારીની કચેરી ખાતે વિરોધ પ્રદર્શન કર્યુ હતુ. મામલો હાઈકોર્ટમાં પહોંચ્યો હતો પરંતુ છેવટે 15 જુલાઈના રોજ રિપીટર વિદ્યાર્થીઓની પરીક્ષા યોજવામાં આવી હતી.

English summary

Gujarat Board 12th Science result for repeaters declared today, only 15% students passed out