ભાજપે ઉમેદવારોની પસંદગી માટે જિલ્લાવાર નિરીક્ષકો જાહેર કર્યા

Published: Tuesday, October 16, 2012, 18:06 [IST]

અમદાવાદ, 16 ઑક્ટોબર : ભારતીય જનતા પાર્ટીની મહત્વની પ્રદેશ બેઠક ગાંધીનગર પાસેના કોબા ખાતે આવેલી કડવા પાટીદારની વાડીમાં ૧૫ ઓક્ટોબરના રોજ મળી હતી. ગુજરાત રાજયની ૧૩ અને ૭ ડિસેમ્બરના રોજ યોજાનારી ૮૭ બેઠકો અને ૯૫ બેઠકોની વિધાનસભાની ચૂંટણીના ભાજપાના ઉમેદવારોની પસંદગીની કાર્યયોજના આ બેઠકમાં તૈયાર કરવામાં આવી હતી.

આ કાર્યયોજના અંતર્ગત ભાજપાના પ્રદેશ અધ્યક્ષ આર સી ફળદુએ ગુજરાતના ૨૬ જિલ્લા અને ૮ મહાનગર મળીને કુલ ૩૪ જેટલા જીલ્લા/મહાનગર માટે ૩૪ ટીમોના નામની જાહેરાત કરી હતી. આ ૩૪ દરેક ટીમોમાં ૩ નિરીક્ષકોના નામ જાહેર કર્યા હતા. આ નિરીક્ષકો પૈકી ૧ નિરીક્ષક તરીકે મહિલાનો સમાવેશ કરાયો હતો.

ભાજપાના પ્રદેશ પ્રવક્તા આઈ કે જાડેજાએ આ અંગેની વિગતો આપતા જણાવ્યું હતું કે પ્રદેશ અધ્યક્ષ આર સી ફળદુએ જાહેર કરેલી નિરીક્ષકોની ટીમ નવરાત્રીના પર્વ દરમ્યાન ૨૪ ઓક્ટોબર સુધીમાં જે તે જીલ્લામાં જઇ આગામી વિધાનસભાની ચૂંટણી માટેના
ઉમેદવારોના સંદર્ભમાં કાર્યકરો અને સમાજના અગ્રણીઓને મળશે. જીલ્લા સ્થાન પરથી આવેલી ઉમેદવાર અંગેની રજૂઆતો, બાયોડેટા સહિતની વિગતનો રિપોર્ટ પાર્લામેન્ટરી બોર્ડ સમક્ષ રજૂ કરશે.

Published On October 16, 2012