સાણંદના કલાણા ગામે સોશિયલ મીડિયા પોસ્ટથી અથડામણ, 40 થી વધુ શંકાસ્પદોની અટકાયત

અમદાવાદના સાણંદ તાલુકાના કલાણા ગામમાં જૂની અદાવતને લીધે બે જૂથો સામસામે આવી જતાં ભારે તણાવ સર્જાયો હતો.

સોમવાર રાતથી શરૂ થયેલો આ વિવાદ મંગળવાર સવાર સુધી ચાલ્યો હતો, જેમાં બંને પક્ષો વચ્ચે ઉગ્ર પથ્થરમારો થયો હતો.

ઘટનાની જાણ થતા જ અમદાવાદ ગ્રામ્ય એસપી અને ડીવાયએસપી સહિતનો મોટો પોલીસ કાફલો તાત્કાલિક ઘટનાસ્થળે પહોંચી ગયો હતો. ગામમાં ફેલાયેલી અશાંતિ અને ડરના માહોલને કારણે અનેક રહિવાસીઓ પોતાના ઘર છોડીને સુરક્ષિત સ્થળે જતા રહ્યા હોવાનું જાણવા મળ્યું છે.

પોલીસ તપાસમાં સામે આવ્યું છે કે, સોશિયલ મીડિયા પર કરવામાં આવેલી કેટલીક પોસ્ટને લઈને આ વિવાદ વકર્યો હતો. સોશિયલ મીડિયાના ઝઘડાએ જોતજોતામાં હિંસક સ્વરૂપ ધારણ કર્યું હતું, જેમાં બંને જૂથો દ્વારા એકબીજા પર હુમલા કરવામાં આવ્યા હતા.

પરિસ્થિતિ પર કાબૂ મેળવવા માટે પોલીસે ગામમાં સઘન કોમ્બિંગ હાથ ધરીને અત્યાર સુધીમાં 40 થી વધુ શંકાસ્પદોની અટકાયત કરી છે. હાલ ગામમાં ચુસ્ત પોલીસ બંદોબસ્ત ગોઠવી દેવામાં આવ્યો છે અને પોલીસનું કહેવું છે કે સ્થિતિ હવે સંપૂર્ણપણે નિયંત્રણમાં છે.

હિંસામાં સંડોવાયેલા તમામ તત્વો સામે કડક કાયદેસરની કાર્યવાહી કરવાની ખાતરી પોલીસ વિભાગ દ્વારા આપવામાં આવી છે.

English summary

A clash in Kalana village, Sanand taluka, Ahmedabad district, stemmed from an old dispute, amplified by social media. Police containment, searches, and hundreds of arrests followed as authorities work to restore safety and stability.