લોકસભા ચૂંટણી પહેલા 1 કરોડની રોકડ ભરેલી કાર સાથે ડ્રાઈવર ઝડપાયો

Lok Sabha elections 2024: લોકસભાની ચૂંટણી પહેલા રાજસ્થાનથી ગુજરાતમાં આવી રહેલી કારમાં શામળાજીમાંથી રૂપિયા 1 કરોડની રોકડ જપ્ત કરવામાં આવી છે.

શામળાજી પોલીસ દ્વારા કારના સિક્રેટ કમ્પાર્ટમેન્ટમાં છુપાવવામાં આવેલા રૂપિયા 1 કરોડનો જથ્થો જપ્ત કર્યો હતો. પૈસા કબ્જે કર્યા બાદ પોલીસે કાર ચાલકની અટકાયત કરી પૂછપરછ હાથ ધરી છે.

લોકસભાની ચૂંટણીને કારણે સરહદી જિલ્લાની પોલીસ હવે દારૂ અને રોકડ સહિતની કિંમતી ચીજવસ્તુઓની ગેરરીતિ સામે સતર્ક છે. આ દરમિયાન અરવલ્લીની શામળાજી પોલીસે 1 કરોડના જથ્થા સાથે કાર કબજે કરી છે.

કારમાં સિક્રેટ બોક્સ બનાવીને છુપાવીને એક કરોડ રૂપિયા લાવવામાં આવી રહ્યા હતા. વાહન ચેકિંગ દરમિયાન જ્યારે એક શંકાસ્પદ કાર અંસોલ નજીક ચેકપોસ્ટ પરથી પસાર થતી જોવા મળી હતી, ત્યારે પોલીસે તેને રોકી હતી. કારની ઝડતી દરમિયાન ગુપ્ત કમ્પાર્ટમેન્ટમાં છુપાયેલ 21 બંડલમાં રાખવામાં આવેલા 1 કરોડ રૂપિયાની રકમ જપ્ત કરવામાં આવી હતી.

શામળાજી પોલીસે કાર ચાલક પર્વતસિંહ શંભુસિંહ રાજપૂતની અટકાયત કરી છે. એએસપી સંજય કેશવાલાએ જણાવ્યું હતું કે, કાર ચાલક રાજસ્થાનના બીલુકા ઘોડા, તાલુકો સલુમ્બરનો રહેવાસી છે.

English summary

A driver was caught with a car loaded with cash worth Rs 1 crore before the Lok Sabha elections