અમદાવાદ કોર્પોરેશન શહેરમાં પ્રદુષણ ઘટાડશે, કોમનવેલ્થ ગેમ્સને લઈને બજેટમાં જોગવાઈ

By Desk

Updated: Friday, February 6, 2026, 20:54 [IST]

અમદાવાદ મ્યુનિસિપલ કોર્પોરેશન દ્વારા વર્ષ 2026-27ના બજેટમાં શહેરની હવાની ગુણવત્તા સુધારવા પર વિશેષ ભાર મૂકવામાં આવ્યો છે. કોમનવેલ્થ ગેમ્સ 2030ને ધ્યાનમાં રાખીને પ્રદૂષણ નિયંત્રણ માટે આયોજન હાથ ધરાયું છે.

આ પ્રોજેક્ટ અંતર્ગત તાજેતરમાં મ્યુનિસિપલ કમિશનર અને IIT કાનપુરના નિષ્ણાતો વચ્ચે એક મહત્વની બેઠક યોજાઈ હતી. જેમાં સ્માર્ટ સેન્સિંગ અને ડિજિટલ ઇન્ટેલિજન્સ ટેકનોલોજીના ઉપયોગ અંગે ચર્ચા કરવામાં આવી હતી.

IIT કાનપુરના પ્રોફેસર સચ્ચિદાનંદ ત્રિપાઠીએ આર્ટિફિશિયલ ઇન્ટેલિજન્સ આધારિત મોનિટરિંગ સિસ્ટમનું પ્રેઝન્ટેશન રજૂ કર્યું હતું. આ સિસ્ટમ દ્વારા શહેરમાં હવાની ગુણવત્તાનું રિયલ ટાઈમ મોનિટરિંગ શક્ય બનશે.

નવા આયોજન મુજબ સેન્સર નેટવર્ક અને મોબાઈલ લેબોરેટરીની મદદથી પ્રદૂષણ ફેલાવતા હોટસ્પોટ્સની ઓળખ કરવામાં આવશે. જેના આધારે વોર્ડ સ્તરે તાત્કાલિક અસરથી પ્રદૂષણ ઘટાડવાના પગલાં લેવાશે.

વર્ષ 2026 થી 2030 દરમિયાન તબક્કાવાર રીતે સેન્સર ઇન્સ્ટોલેશન અને ડેટા પ્લેટફોર્મ વિકસાવવાનું કામ પૂર્ણ કરવામાં આવશે. આ વૈજ્ઞાનિક અભિગમથી શહેરના પર્યાવરણને મોટો ફાયદો થવાની આશા છે.

આ ટેકનોલોજી આધારિત પહેલથી અમદાવાદમાં રોડ ડસ્ટ, ટ્રાફિક અને વાહનોના ઉત્સર્જન પર અસરકારક નિયંત્રણ લાવી શકાશે. જેના કારણે નાગરિકોના આરોગ્યમાં પણ નોંધપાત્ર સુધારો જોવા મળશે.