Happy B'day : ચાર વર્ષીય શ્રેયાના હાથે રમકડાં નહીં, હાર્મોનિયમ રહેતું!

Published: Wednesday, March 12, 2014, 16:47 [IST]

મુંબઈ, 12 માર્ચ : બૉલીવુડમાં દરેક માણસ પોતાની જુદી ઓળખ બનાવે છે. કોઈ પોતાની એક્ટિંગનો જાદૂ દર્શકો ઉપર પાથરે છે, કોઈ ડાયરેક્શન વડે લોકોને દીવાનો બનાવે છે, જ્યારે કેટલાંક લોકો પોતાના અવાજ વડે પોતાની શખ્સિયત બનાવે છે. અવાજથી ઓળક સ્થાપનાર એવા જ એક પાર્શ્વ ગાયિકાનું નામ છે શ્રેયા ઘોષાલ. 12મી માર્ચ, 1984ના રોજ રાજસ્થાનમાં રાવતભાટા ખાતે જન્મેલા શ્રેયા આજે 30 વર્ષના થઈ ગયાં છે.

શ્રેયાએ ચાર વર્ષની ઉંમરથી હાર્મોનિયમ ઉપર પોતાની માતા સાથે સંગીતનુ શિક્ષણ મેળવવાનું શરૂ કર્યુ હતું. સંગીતના પ્રાથમિક શિક્ષણ બાદ શ્રેયાના માતા-પિતાએ તેમને કોટા ખાતે મહેશચંદ્ર શર્મા પાસે હિન્દુસ્તાની શાસ્ત્રીય સંગીતનું વિધિવત શિક્ષણ મેળવવા માટે મોકલ્યા હતાં.

શ્રેયા ઘોષાલે પોતાના સંગીતની સફરની શરુઆત 1996માં ઝી ટીવીના શો સારેગામામાં બાળ કલાકાર તરીકે ભાગ લઈ કરી હતી. 12 વર્ષની વયે શ્રેયા ઘોષાલ પોતાનું હુનર લઈ સારેગામાના મંચે દુનિયા સામે આવ્યા હતાં. આ શો દરમિયાન જ તેમની મુલાકાત સંગીતકાર કલ્યાણજીભાઈ સાથે થઈ. કલ્યાણજી શ્રેયા ઘોષાલના ગાયનથી ખૂબ જ પ્રસન્ન થયાં અને તેમને બે વર્ષ સુધી સંગીતનું શિક્ષણ આપ્યું.

શ્રેયા ઘોષાલે જ્યારે સારેગામાના બીજા ભાગમાં ભાગ લીધો, ત્યારે સંગીતકાર સંજય લીલા ભાનુશાળીને તેમનો અવાજ સારો લાગ્યો અને તેમણે શ્રેયાને દેવદાસ ફિલ્મમાં ગીત ગાવાની તક આપી. ફિલ્મ દેવદાસમાં શ્રેયાએ બૈરી પિયા... ગીત સાથે શરુઆત કરી. દેવદાસ માટે તેમને સર્વશ્રેષ્ઠ ગાયિકાનું ફિલ્મફૅર પુરસ્કાર પણ મળ્યું. આ ફિલ્મ બાદ શ્રેયા ઘોષાલ માટે બૉલીવુડનો માર્ગ ખુલ્લો થઈ ગયો. શ્રેયાએ અગ્નિપથ ફિલ્મમાં આયટમ નંબર ચિકની ચમેલી... અને તે અગાઉ ધ ડર્ટી પિક્ચરમાં ઉ લા લા ઉ લા લા... ગીતને પોતાનો અવાજ આપ્યો.