ગોવામાં 43મો આંતરરાષ્ટ્રીય ભારતીય ફિલ્મ ફેસ્ટિવલ શરૂ

Updated: Tuesday, November 20, 2012, 17:15 [IST]

પણજી, 20 નવેમ્બર : ગોવામાં આજે બહુચર્ચિત 3ડી ફિલ્મ લાઇફ ઑફ પાઇના પ્રદર્શન સાથે 43મા ભારતીય આંતરરાષ્ટ્રીય ફિલ્મ ફેસ્ટિવલ એટલે કે આઈએફએફઆઈનો શુભારંભ થયો. એકેડેમી પુરસ્કાર વિજેતા આ ફિલ્મના દિગ્દર્શક આંગ લી છે. આ પ્રસંગે ફિલ્મના સભ્યો પણ ઉપસ્થિત રહ્યા હતાં.

પણજી ખાતે આવેલ કલા એકેડેમીમાં યોજાયેલ આ સમારંભમાં આંગ લી પણ હાજર રહેવાના હતાં, પરંતુ ન્યુયૉર્કમાં પોતાના કોઈ આંતરરાષ્ટ્રીય કામે વ્યસ્ત હોવાના પગલે તેઓ ભાગ લઈ શક્યા નહિં.

બૉલીવુડના અભિનેતા અક્ષય કુમારે આ સમારંભનું ઉદ્ઘાટન કર્યું. યાન માર્ટલની બુકર પ્રાઇઝ વિજેતા નવલકથા લાઇફ ઑફ પાઇ પર આધારિત આ ફિલ્મના પ્રદર્શન સાથે 43મો ભારતીય આંતરરાષ્ટ્રીય ફિલ્મ સમારંભ શરૂ થઈ ગયો છે. આ ફિલ્મનુ શુટિંગ મુખ્યત્વે ભારત અને તાઈવાન ખાતે થયું છે. ફિલ્મમાં ઇરફાન ખાન, તબ્બુ, રાફે સ્પાલ તેમજ જિયાર્ડ દેપારદિયુએ કામ કર્યું છે. સૂરજ શર્માએ આ ફિલ્મ વડે ફિલ્મી દુનિયામાં પ્રવેશ કર્યો છે. મીરા નાયરની રિલેક્ટેંટ ફંડામેંટલિસ્ટ સમારંભના અંતે દર્શાવાશે.

ખાનાબદોશ સમુદાય ગોવલીના જીવન પર આધારિત કોંકણી ભાષાની ફિલ્મ દિગાંત સમારંભમાં એકમાત્ર ગોવાની ફિલ્મ છે. આ ફિલ્મ સાથે આશા છે કે તે દર્શકોનું સૌથી વધુ ધ્યાન ખેંચી શકશે.