BSEએ વોલ્યુમ આકર્ષવા સેન્સેક્સમાં મિનિમમ પ્રાઇસ મૂવમેન્ટ વધારી

Published: Monday, January 5, 2015, 17:27 [IST]

મુંબઇ, 5 જાન્યુઆરી : બોમ્બે સ્ટોક એક્સચેન્જ (બીએસઇ - BSE)એ વોલ્યુમ આકર્ષવા અથવા તો એમ કહો કે શેરનું વોલ્યુમ વધારવા આક્રમક નીતિ અપનાવી છે. આ માટે બીએસઇએ એક્સ્ચેન્જ પર લિસ્ટેડ શેર અને સેન્સેક્સ ફ્યુચર્સની ટિક સાઇઝ અથવા ભાવની ઓછામાં ઓછી વધઘટમાં વધારો કરવામાં આવ્યો છે.

સૂચિત ફેરફાર પછી બીએસઇ પર લિસ્ટેડ રૂપિયા 500થી રૂપિયા 2,000ની રેન્જના શેરના ભાવમાં હાલના રૂપિયા 0.10ની તુલનામાં રૂપિયા 0.25ની વધઘટ થશે. લઘુતમ બિડ પ્રાઇસમાં કરાયેલો આ ફેરફાર જુદા જુદા ભાવની રેન્જમાં ટ્રેડ થતા શેરોને લાગુ પડશે.

આ અંગે પ્રાપ્ત માહિતી અનુસાર આગામી મહિનામાં બીએસઇ પર લિસ્ટેડ તમામ શેરની ટિક સાઇઝમાં વધારો કરવામાં આવશે. ઘણાં વર્ષોથી આ ફેરફારની રાહ જોવાતી હતી. તેની અસરને પગલે વોલ્યુમમાં થોડો વધારો થશે. નાની ટિક સાઇઝનો ફાયદો સતત સટ્ટો કરતા આલ્ગોરિધમિક ટ્રેડર્સને જ મળતો હતો.

બિડ-આસ્ક (ખરીદનાર અને વેચનારનો ભાવ) વચ્ચેના ઊંચા તફાવતને લીધે શેરનું વોલ્યુમ વધે છે, જે ટ્રેડને વધુ પરિપક્વતા પૂરી પાડે છે.કેટલાક બ્રોકર્સનું માનવું છે કે ટિક સાઇઝ બહુ ઓછી હોવાથી તરલતા ઘટે છે. કારણ કે લિક્વિડિટી સપ્લાયર્સ તેમની ઓર્ડરની માહિતી આપવામાં ખચકાટ અનુભવે છે.

Published On January 5, 2015