Rajasthan Lok sabha Election 2024: ઈવીએમમાં મારા નામ પર લગાવેલી છે પટ્ટી, રવિન્દ્ર ભાટીનો આરોપ

Published: Friday, April 26, 2024, 14:02 [IST]

Rajasthan Lok sabha Election 2024: લોકસભા ચૂંટણી માટે આજે બીજા તબક્કામાં મતદાન ચાલી રહ્યું છે. જેમાં રાજસ્થાનની હોટ સીટ બાડમેર-જેસલમેર લોકસભા બેઠકના અપક્ષ ઉમેદવાર રવિન્દ્ર સિંહ ભાટીએ ચૂંટણીમાં ગેરરીતિ થઇ રહી હોવાનો ગંભીર આરોપ લગાવ્યો છે.

રવિન્દ્ર સિંહ ભાટીએ સોશિયલ મીડિયા પર લખ્યું છે કે, બૈતુ એસેમ્બલીની અંદર મારા એજન્ટોને બૂથની બહાર ફેંકી દેવામાં આવી રહ્યા છે, અને વોટિંગ મશીનમાં મારા નામ પર પટ્ટી લગાવી દેવામાં આવી રહી છે. આ કેવા પ્રકારની લોકશાહી છે? આખરે વહીવટીતંત્ર કોના દબાણમાં કામ કરી રહ્યું છે?

ગંભીર આરોપો લગાવવા ઉપરાંત રવિન્દ્ર સિંહ ભાટીએ બાડમેર પોલીસ સાથે દલીલનો વીડિયો શેર કર્યો છે. જોકે પોલીસે રવિન્દ્ર ભાટીના આરોપોને ફગાવી દીધા છે.

પોલીસ અને પ્રશાસને જણાવ્યું હતું કે, બાડમેર સંસદીય ક્ષેત્રમાં આવી કોઈ ઘટના પ્રકાશમાં આવી નથી. પોલીસ મોબાઇલ પાર્ટી અને સુપરવાઇઝરી અધિકારીઓ સતત બૂથની મુલાકાત/નિરીક્ષણ કરી રહ્યા છે. મતદાન શાંતિપૂર્ણ રીતે ચાલી રહ્યું છે.

ઉલ્લેખનીય છે કે, બાડમેર-જેસલમેર સીટ પર ભાજપના કૈલાશ ચૌધરી, કોંગ્રેસના ઉમેદવાર રામ બેનીવાલ અને અપક્ષ ઉમેદવાર રવિન્દ્ર સિંહ ભાટી વચ્ચે જોરદાર ટક્કર છે. રવિન્દ્ર ભાટી શિવ સીટ પરથી અપક્ષ ધારાસભ્ય છે. આ અગાઉ તેઓ ભાજપમાં હતા. ટિકિટ ન મળતા તેઓએ બળવો કર્યો હતો.

સવારે 11 વાગ્યે કેટલા ટકા મતદાન થયું?