આવતીકાલથી ભવનાથના મેળાનો પ્રારંભ, એસટી નિગમ 195 બસો દોડાવશે

જૂનાગઢમાં આવતીકાલ 11 ફેબ્રુઆરીથી ઐતિહાસિક મહાશિવરાત્રિ મેળાનો પ્રારંભ થઈ રહ્યો છે. ગિરનારની તળેટીમાં પાંચ દિવસ સુધી ચાલનારા આ ભવ્ય મેળામાં લાખો ભક્તો ઉમટી પડશે.

ભક્તોની સુવિધા માટે ગુજરાત એસટી નિગમે 195 જેટલી વધારાની બસો દોડાવવાનો નિર્ણય લીધો છે. નિગમ દ્વારા આ મેળા દરમિયાન અંદાજે 7800 જેટલી ટ્રિપ્સનું ખાસ આયોજન કરવામાં આવ્યું છે.

એસટી વિભાગના આ આયોજનથી અંદાજે 3.70 લાખથી વધુ શ્રદ્ધાળુઓને પરિવહનની સરળતા રહેશે. આ મિનિ કુંભ મેળામાં ભીડને પહોંચી વળવા માટે તંત્રએ તમામ તૈયારીઓ પૂર્ણ કરી લીધી છે.

જૂનાગઢ બસ સ્ટેશનથી ગિરનાર તળેટી સુધી જવા માટે 80 જેટલી લોકલ બસો સતત દોડશે. આ ઉપરાંત અન્ય જિલ્લાઓમાંથી આવતા લોકો માટે પણ 115 એક્સપ્રેસ બસોની વ્યવસ્થા કરાઈ છે.

મુસાફરોની સલામતી માટે તમામ એસટી બસોનું 24 કલાક જીપીએસ દ્વારા મોનિટરિંગ કરવામાં આવશે. આ વર્ષે મેળો વધુ ભવ્ય હોવાથી પરિવહન સુવિધા પર વિશેષ ભાર મૂકવામાં આવ્યો છે.

English summary

Gujarat State Transport announces an expanded bus plan for the Junagadh Shivaratri Mela, adding hundreds of extra trips and interdistrict routes to manage large crowds with real-time GPS monitoring for safety and efficiency.